Қарағанды облыстық мәслихатына аралас жүйе бойынша 36 депутат сайланады: 18 – партиялық тізім бойынша және 18 – бір мандатты округ бойынша, деп жазады inbusiness.kz Қарағанды облысының әкімдігіне сілтеме жасап.
Облыстық сайлау комиссиясының хабарлауынша, Қарағанды облыстық мәслихатына сайлауға тізімдерді алты партияның филиалдары ұсынды: Қазақстан Халық партиясы, Қазақстанның "Байтақ" жасылдар партиясы, "Ауыл", AMANAT, "Ақ жол" және Respublica.
"Партиялық тізімге облыстық мәслихат депутаттығына барлығы 59 кандидат енгізілді", – делінген облыстық сайлау комиссиясының хабарламасында.
Тағы 69 кандидат 18 бір мандатты округ бойынша ұсынылды. Бұл өзін-өзі ұсынушылар және партиялардың өкілдері.
Бір мандатты екі округ бойынша мәжіліске 31 кандидат ұсынылды. Оның бесеуі партиядан: AMANAT, "Ақ жол" және Қазақстан Халық партиясы, біреуі – "Қазақстан тұтынушыларының Республикалық Қауымдастығы" ЗТБ қоғамдық бірлестігінен, қалғаны – өзін-өзі ұсыну жолымен.
Қалалық және аудандық мәслихаттарға кандидаттар үшін сайлаушылар тек бір мандатты округтер бойынша дауыс беретін болады.
Үміткерлерді тіркеу 18 ақпан сағат 18.00-ге дейін жалғасады. Содан кейін 18 наурыз күні сағат 00:00-ге дейін өтетін сайлау науқаны басталады. 18 наурыз-тыныштық күні. 19 наурыз-сайлау күні.
