Атырау облысы Құрманғазы ауданы Көптоғай ауылында анасы төрт айлық баласын пышақтап өлтірген, деп жазды inbusiness.kz тілшісі.
Оқиға 26 сәуір күні болған. Әйелдің жасы 41-де. Ол нәрестенің жылай бергеніне шыдамай, оған бірнеше жерінен ас үй пышағын сұғып алған. Қазіргі күні қылмысын мойындаған.
"Бұл дерек бойынша ҚР ҚК 99 бап 2 бөлігі 3 тармағына сәйкес, іс қозғалып, тергеу жүріп жатыр", - деп хабарлайды облыстық полиция департаментінің бастығы Хамза Үмбетқалиев.
Бұдан бөлек, облыс аумағында 24-26 сәуір аралығында "Есеп" жедел-профилактикалық іс-шарасы өтуде. Тек қана соңғы үш күн ішінде шара аясында 172 тұлға ішкі істер органдарының есебіне алынған. Акция рецидивтік, алкогольдік, отбасы-тұрмыстық қылмыстың алдын алу және жолын кесу мақсатында өтіп жатыр.
"Ауыр қылмыс жасап, жазасын түзеу мекемелерінде өтеп, мерзімінің аяқталуымен босап шыққан 2 тұлға әкімшілік қадағалауға алынды. Сонымен қатар, отбасылық-тұрмыстық салада құқық бұзушылықтардың алдын алу бағытында 89 тұлғаға қатысты қорғау нұсқамасы, 44 тұлғаға мінез құлқына қатысты сот тарапынан ерекше талап белгіленді. Сондай-ақ, 1 маскүнем, 6 жайсыз отбасы анықталып, 6 бала есепке қойылды. Профилактикалық және тізімдік есепте тұрған 2237 тұлға тексерілді", - дейді ПД баспасөз қызметінен.
Құралай Қуатова
