Түркияның Ыстамбұл, Анкара, Бурса қалаларының әкімшілігі пандемияға байланысты жаңа жарлық шығарды. Құжат бойынша енді осы шаһарлардың тұрғындары көшеде міндетті түрде маска киіп жүруге тиіс.
Басшылықтың мұндай қадамға баруына соңғы күндері коронавирус жұқтырғандар санының артуы себеп болған. 15 маусымда 1592, 16 маусымда 1467, 17 маусымда 1429 науқас тіркелген.
Бұған дейін де Түркия билігі азаматтардың қоғамдық орындарда бетперде киіп жүруін талап еткен еді. Осы күнге дейін мұндай ереже елдегі 81 провинцияның 42-сінде енгізілген.
Еске сала кетсек, 11 наурызда Дүниежүзілік денсаулық сақтау ұйымы коронавирус індетін пандемия деп жариялаған болатын. Осы күнге дейін әлем бойынша вирус жұқтырғандардың саны 8 миллионнан асып, оның 440 мыңнан астамы қайтыс болған.
Табиғат Нұрболат
