Мәдениет және спорт министрі Ақтоты Райымқұлова халыққа фонограмма тыңдау немесе тыңдамау құқығы берілге тиіс екенін айтты. Оның сөзінше, фонограмма қолданылатын болса, тыңдарманға алдын ала хабарлануы керек.
"Шынында да, кейінгі кезде қазақстандық қоғамда отандық эстрадаға қатысты сұрақтар көп туындап жатыр. Бұл ретте маңызды мәселенің бірі – фонограмманы қолдану. Фонограммаға қатысты сын сөз айтатын халықтың қарасы мол. Әлеуметтік желілерде де мұндай сынның көп екенін байқаймыз. Сол себепті бұл мәселені шешу үшін мәдениет және спорт министрлігі "Қазақстан Республикасының мәдениеті туралы" заңға өзгерістер мен толықтырулар енгізіп, мәжілістің қарауына жіберді", – деді Ақтоты Райымқұлова.
Министрдің мәлімдеуінше, заң жобасының үкіметтік нұсқасында "фонограмманы пайдалану тәртібі" (телевидение мен радиодан басқа жердің бәрінде тыйым салу) туралы норма бар.
"Әрбір заң жобасы мүдделі мемлекеттік органдар мен "Атамекен" ұлттық кәсіпкерлер палатасының мақұлдауынан өтеді. Біз заң жобасы арқылы аудиторияға фонограмманың пайдаланылатыны туралы алдын ала хабарлау тәртібін ұсынамыз. Шынында да бұл мәселе өзекті екенін айтқым келеді. Біз эстрадада жұмыс істейтін субъектілердің мүддесін ескере отырып, мәселені жан-жақты талқылауымыз керек. Екінші жағынан тұтынушының мүддесін де қорғауға тиіспіз. Тыңдарманға алдын ала хабарлау керек. Осылайша халық жанды дауыстағы әнді тыңдағысы келе ме, әлде фонограммаға келісе ме, өзі шешеді", – деді Ақтоты Райымқұлова.
Қанат Махамбет
