Бюджет қаржысын талан-таражға салу дерегі еліміздің бірнеше өңірінде тіркелді. Мысалы, Жамбыл облысында аудандық аурухана бас дәрігерлерінің біріне қатысты 2,7 миллион теңге сомасында аурухана қызметкерлеріне төленген үстемақыны жинау дерегі бойынша материалдар сотқа жолданды. Сонымен қатар, Шымкентте медицина мекемелерінің лауазымды тұлғаларына қатысты іс қозғалды. Олар коронавирус инфекциясын жұқтыру қаупі жоқ топтағы қызметкерлерге 50 млн теңгеден аса сомадағы үстемақыны негізсіз төлеген. Мұндай дерек Қызылорда облысында анықталды. Онда аудандық аурухана қызметкерлеріне 12 млн теңгеден аса сомаға үстемақыны негізсіз берілген. Жалпы аталған деректерге қатысты бірқатар медицина мекемелерінің бас дәрігері мен медицина қызметкері тәртіптік жауапкершілікке тартылды.
