Еліміздің оңтүстігінде апатқа ұшыраған №10 пойыздың 400-ден астам жолаушысы Алматыға жеткізілді, деп хабарлайды "Қазақстан темір жолы" ҰК"АҚ баспасөз қызметі.
"Жолаушыларды белгіленген пункт Шу стансасына дейін шұғыл жеткізу үшін 7 жолаушылар вагоны жөнелтілді", деп жазылған хабарламада.
Келген жолаушыларға Алматы-1 теміржол вокзалында медициналық көмек көрсетілді. Сондай-ақ қосымша ақпараттық-анықтамалық аймақта жолаушыларға темір жол билеттерінің құнын қайтару үшін кеңес берілді.
ҚТЖ баспасөз қызметі теміржол апаты Астана-Алматы учаскесі бойынша жүретін пойыздар қозғалысы кестесіне әсер етпейтінін айтты.
Жексенбі күні жергілікті уақыт бойынша сағат 13.25-те Жамбыл облысының Шу ауданында Астана-Алматы қатынасындағы №9/10 жолаушылар пойызының сегіз вагоны рельстен шығып кеткен, оның үшеуі аударылып қалған. Апат салдарынан 12 жасар бала қайтыс болды.
Көлік полициясы ҚР Қылмыстық кодексінің 344- бабының 2 бөлігі (темір жол, әуе, теңіз немесе өзен көлігі қозғалысы мен пайдаланудың қауіпсіздік ережесін бұзу) бойынша қылмыстық іс қозғады.
