Бүгінде ауқымды фитомелиоративтік бағдарлама аясында Арал теңізінің 1,1 млн гектардан аса құрғатылған түбі көгалдандырылған, деп жазады inbusiness.kz сайты.
Қазіргі уақытта Қазақ ғылыми-зерттеу институты құрылған сексеуіл екпелерінің учаскелерінде түрлі жемшөп өсімдік тұқымдарын жерасты себуді жүргізіп келеді.
– Бұл зерттеулер кейіннен осы жасанды көгалдандырылған алаңдарды толыққанды шалғайдағы жайылым ретінде пайдалануға бағытталған. Бұл әдісті табысты іске асыру мал шаруашылығы үшін тұрақты жемшөп қорын қалыптастыруға және бір кездері өлі шөлді құнды жаңартылатын ресурсқа айналдыра отырып, фитомелиорланған жерлердің экономикалық әлеуетін едәуір арттыруға мүмкіндік береді, – делінген министрлік мәлімдемесінде.
Орман өсірудің дәстүрлі әдістерімен қатар, ғалымдар Арал теңізінің құрғаған түбінде озық биотехнологияларды қолдану бойынша зерттеу жобаларын белсенді жүргізіп жатыр.
Жаза кеткен жөн, Арал теңізінің құрғатылған түбінің жалпы ауданы бүгінде шамамен 6 млн га құрайды, оның жартысына жуығы, яғни 2,8 млн гектары Қазақстан аумағына тиесілі. Соңғы 5 жылда орман мелиорациялық жұмыстары 1 млн 117,5 мың га аумақты қамтыды. 2026 жылы жасыл қор тағы 116 мың га ұлғайды.
Ғалымдар төтенше жағдайларда өсе алатын жергілікті өсімдіктер мен галофиттерге назар аударуда. Атап айтқанда, аумақта қара сексеуіл, Рихтер сораңы, Палецкий сораңы, ағаш тәрізді сораң, жыңғыл, қарабарақ, Каспий қарабарағы және сарсазан өсіріледі.
Экология министрлігі Қазалы ауданында екпелерді сапалы материалмен қамтамасыз ету үшін қуаттылығы жылына 3 млн көшет болатын ірі тәлімбақтың құрылысы аяқталғанын мәлім етті. Сондай-ақ, қысқа мерзімде аралдың ең құрғаған түбінде ауданы 15 га жаңа орман тәлімбағын құру жоспарлануда.
– Модульдік контейнерлер орнатылып, секундына 8-9 литрге дейін жылы су беретін 500 метрлік ұңғыма бұрғыланды. Мұндай жағдайда өсірілген отырғызу материалы экстремалды тіршілік ету ортасына барынша бейімделеді, – деп ақпарат таратты министрлік мамандары.
