Арцахты (Таулы-Қарабақ Республикасы) тарату туралы құжаттың заңды күші жоқ. Бұл туралы ТҚР-дың соңғы президенті Самвел Шахраманян мәлімдеді, деп жазады inbusiness.kz сайты.
"Арцахқа оралу – бұл біздің құқығымыз және ол Арменияның мемлекеттік мүдделеріне кедергі бола алмайды немесе қайшы келмейді. Арменияға көшкеннен кейін біз, мен бұл туралы Арцахтың барлық шенеуніктеріне хабарладым, Армения қауіпсіздігінғ басымдылық берілетін саяси жаңа бағдарды қабылдадық. Армения да – біздің отанымыздың негізгі бөлігі және біз Армения билігі жүргізіп жатқан процестерге қауіп төндірмей, оның қауіпсіздік жүйесіне зиян тигізбеуіміз керек", – деді Шахраманян.
Оның айтуынша, Арцахты тарату мәселесі манипуляция құралына айналып бара жатыр.
"Бұл жалған тезис. Біз қол қоюға мәжбүр болған бұл құжат Арменияға бейбіт тұрғындарды қауіпсіз көшіруге мүмкіндік берді.
Қарулы күштер мен күш құрылымдарының шенеуніктері де көшірілді. Өкінішке орай, әскери-саяси басшылықтың арасынан кепілге алынғандар да болды. Біз бастапқыда бұл құжаттың конституцияға қарсы әрі заңсыз екенін білдік. Құжатты нормативтік акт деп атау үшін оның заңды күші болмады, ресми түрде жарияланбады, құқықтық жүйеге енгізілмеді. Біз халықтың пікірін білеміз. Ол Әзербайжанның езгісімен Әзербайжан құрамына кіргісі келмеді және өз Отанынан кетуге шешім қабылдады. Біз бұл құжатқа қатысты шешім қабылдадық. Мен бұл туралы Армения үкіметін Премьер-Министрдің атынан жазбаша хабардар еттім", - деп қосты шенеунік.
Ол соңғы онжылдықтарда Арцахтың атынан келіссөздерге тек Армения билігі қатысқанын еске салды.
"Біз Арцах мәселесін халықаралық күн тәртібіне қайтару Армения билігінің міндеті деп санаймыз. Оны барлық мүдделі құрылымдармен талқылауға дайынбыз. Армения билігі Арцахтан бас тартты. Менің ойымша, Армения халқының көпшілігі бұл пікірмен келіспейді. Біз Арцахтың мәселесін және армяндардың Арцахқа оралуын күшті Армения арқылы шешуге болатынына сенімдіміз. Армения билігі Арцах армяндарының құқықтарын қорғау үшін, соның ішінде халықаралық алаңдарда бәрін жасауы керек. Біз әртүрлі форматтағы келіссөздерге дайынбыз. Ең бастысы, дұрыс міндет пен формат тұжырымдалып, қойылды", - деп атап өтті Шахраманян.
Айта кету керек, Армения премьер-министрі Никол Пашинян – Таулы Қарабақты Әзербайжанның бір бөлігі деп таныған армян басшыларының алғашқысы:
"Мен Таулы Қарабақты тарату туралы шешімге қол қойған жоқпын. Бұл құжатқа қол қойылғанға дейін Таулы Қарабақта төңкеріс болды, оны Арменияда сіз білетін шенділер құптады".
Оның айтуынша, "Таулы Қарабақ мәселесі белгілі бір сәттен бастап Армения Республикасына ықпал ету құралы әрі Армения Республикасының Тәуелсіздігі мәселесін шешуге әсер ететін факторға айналды".
"Арменияны тәуелсіздіктен айыру үшін Таулы Қарабақ мәселесін қолданып, ел ішінде іріткі салатындар бар және олардың мекен-жайлары бәріне белгілі", – деді Аремения басшысы.
