Аргентина Жоғарғы соты орналасқан Буэнос-Айрестегі бұрынғы әділет министрлігінің жертөлесінен Германиядағы нацистік режимнің 1930-1940 жылдардағы қызметіне қатысты жүздеген құжаттары бар жәшіктер табылды, деп хабарлайды inbusiness.kz сайты.
Мәліметтерге сәйкес, қағаздар Әділет министрлігінің жертөлесіндегі 12 ағаш шампан жәшігінде сақталған. Құжаттардың ішінде төлқұжат, партия билеттері, үгіт-насихат материалдары, ақ-қара фотосуреттер, парақшалар, дәптерлер бар. Кейбір құжаттарда Адольф Гитлердің қолы да кездеседі.
Бұл олжа 1941 жылы маусымда Nan-a-Maru кемесімен Токиодағы Германия елшілігінен Аргентинаға жеткізілген 83 жәшік құжаттардың бір бөлігі болуы мүмкін екені атап өтілді. Қазіргі уақытта мұрағатты Холокост мұражайының мамандары мен тергеушілері зерттеп жатыр.
Олардың міндеті - құжаттардың тарихи маңыздылығын бағалау және оларда бүкіл әлем бойынша нацистік "ақша ізінің" бұрын белгісіз аспектілеріне жарық түсіруге көмектесетін маңызды ақпарат бар-жоғын анықтау.
