Шымкенттегі жоғары спорт шеберлігі мектебі кешенінде Бокстан Сидней Олимпиадасының және Әлем чемпионатының күміс жүлдегері Мұxтарxан Ділдәбековтің жүлдесіне арналған жасөспірімдер арасындағы VI Халықаралық турнир аяқталды.
Алты мемлекеттің боксшылары бас қосқан ірі халықаралық турнир қорытындысы бойынша Қазақстанның жасөспірімдер құрамасы 13 салмақтың 5-і бойынша жеңіске жетті. Ал үш салмақта қарсылас шыдатпаған Ресей құрамасы жүлделі екінші орынға тұрақтады. Украина мен Өзбекстан құрамасы бір-бір алтын медальға ие болды.
54 келіде күнгейлік спортшы Асхат Тастанбек пен жеңіл салмақта рингке шыққан Бейбарыс Пернебек турнир жеңімпазы атанды.
Турнирді қорытындылаған өңірдің дене шынықтыру және спорт басқармасының басшысы Әлібек Нұртаев Мұхтархан Ділдәбеков атындағы жарыстың жоғары деңгейде өткенін айтты. Турнирді ұйымдастырушылар жарысты халықаралық деңгейде өткізуге атсалысқан іскер азаматтарға естелік медальдар тапсырды. Ринг төрінде кезекті рет тәжірибе жинақтаған саңлақтар енді Аргентинада өтетін жасөспірімдер олимпиадасында күш сынасатын болады.
