Қарағанды облысындағы "АрселорМиттал Теміртау" компаниясының 2 жұмысшысы өндірісте жарақат алды, деп хабарлайды inbusiness.kz порталы облыстық денсаулық сақтау басқармасының баспасөз қызметіне сілтеме жасап.
Басқарманың мәліметінше, бір жұмысшының денесінің 25%, екіншісінің 95% күйік шалған. Олар ауруханаға жатқызылған.
"АрселорМиттал Темиртау" АҚ қайғылы оқиға бүгін металлургиялық комбинаттағы механикалық цехтың шеберханасында болғанын хабарлады.
"11 наурызда 2-жылу электр орталығындағы (ТЭЦ) цех шеберханасында дәнекерлеу жұмысын жүргізу кезінде жанар-жағармай материалдары өртенді. Салдарынан слесарь мен газ жабдығын баптаушысын күйік шалды. Олар ауруханаға жатқызылды. Оқиғаның мән жайын анықталып жатыр", - деп жазылды компания таратқан хабарламада.
Облыстық денсаулық сақтау басқармасының мәліметінше, өрттен бояу толы бөшке жарылған.
Қарағанды облысының еңбек инспекциясы оқиғаның мән-жайын анықтау үшін арнайы комиссия құрылатынын хабарлады.
