Бұл туралы Мәдениет және спорт министрлігі спорт және дене шынықтыру істері комитеті төрағасының орынбасары Бекболат Байжанов мәлім етті, деп жазады inbusiness.kz ҚазАқпаратқа сілтеме жасап.
Мамандар спорт түрлерін қысқартпас бұрын жан-жақты пысықтап, талқылаудан өткізгендерін айтады.
"Спорт саласы бойынша тапсырыстарға өзгерістер енгізілді. Ақылдаса, зерделей келе қолданбалы күш спорты түрлерін азайту туралы шешім қабылдадық. Сөйтіп Artsport жобасы бойынша спорт түрлері 71-ден 64-ке дейін қысқартылды. Олардың қатарында пауэрлифтинг, армлифтинг және ауыр атлетика спорт түрлері бар. Қолданбалы күш спорт түрлері болғандықтан білікті жаттықтырушы, нақты жоспары мен оқу-үйрету методикасы қажет. Осы жайттарды ескере келе спорт түрлері азайтылды", – деді Бекболат Байжанов.
Министрлік өкілінің айтуынша, алдағы уақытта жобаға қабылданатын баланың жасына да мән берілмек.
"Қолданыстағы №42 бұйрық қайта сәйкестендірілді. Онда спортпен айналысатын балалар мен жасөспірімдердің жас ерекшелігі туралы айтылған. Бұрын 5 жастан болса, енді бала әр спорттың өз талабы мен ережесіне қарай қабылданады", – дейді ол.
