Күзгі әскери шақыру науқаны туралы брифингте ҚР ҚК БШ Ұйымдастыру-жұмылдыру жұмыстары департаментінің бастығы, полковник Сәкен Жүсіпов бұл жолғы өзгерістерге тоқталды. Оның сөзінше көктемде жастарды қарулы күштер қатарына қабылдағанда коронавирустық инфекцияға ПТР зерттеу бір рет жасалса, бұл жолы талаптар күшейтілген.
"Қазақстан күштерінде коронавирустық инфекцияның таралуын алдын алу жұмыстары жүргізілуде. Жиын пунктерінде, қарулы күштердің бөлімдерінде санитарлық талаптар күшейтілді. Көктемгі әскерге шақырумен салыстырғанда енді ПТР зерттеу екі рет жүргізіледі. Бірінші, әскерге шақыру кезінде, яғни, жиын пунктерінде. Екінші, жас буын әскери бөлімдерге келген кезде. Арнайы пунктердегі комиссия мен комиссиядан өтуге келген азаматтардың барлығы бетперделермен қамтылып, санитарлық талаптар сақталады", – деді полковник.
Құралай Құдайберген
