Жамбыл облысының Шу, Қордай аудандарында орын алған төтенше жағдай салдарын жою жөніндегі жедел штабқа "Оңтүстік" өңірлік қолбасшылығынан жедел топ бөлінді. Бұл туралы inbusiness.kz сайты Қазақстан Республикасы Қорғаныс министрлігінің баспасөз қызметіне сілтеме жасап хабарлайды.
Өткен түнде Гвардейск гарнизоны әскери бөлімдерінің күш-құралдарымен ауа-райының қолайсыздығына байланысты автокөлік жолдарынан Кенен елді мекеніне 150-ден астам, ал Қайнар кентіне 80-нен астам адам эвакуацияланды. Әскери қызметшілер түні бойы көліктері қар құрсауында қалған адамдарға жәрдем берді.
"Зардап шеккендерді іздеу мен эвакуациялау үшін 14 бірлік әскери техника, оның ішінде көп мақсатты тягачтар мен өтімділігі жоғары көліктер тартылған. Қауіпсіздікті қамтамасыз ету және адамдарға көмек көрсету мақсатымен Гвардейск гарнизоны әскери бөлімдері жеке құрамының күшімен санитарлық бекет пен жылыту пункттері ашылды", -делінген баспасөз хабарламасында.
Сондай-ақ, жедел штабтың шешімі бойынша, "Оңтүстік" өңірлік қолбасшылығы әскерлері қолбасшысының басқармасынан төтенше жағдай кезінде зардап шеккендерді іздеу мен эвакуациялауды ұйымдастыру мақсатында қажетті көлік құралдары мен жеке құрам бөлінеді.
