Іс-шараға мыңға жуық адам қатысып, елорда тұрғындары мен қонақтары бірлесіп йога жаттығуларын орындады.
"Йога – салауатты ұзақ өмір сүру өнері" ұранымен өткен мерекелік шараны Үндістанның Қазақстандағы елшілігі мен Свами Вивекананда атындағы мәдени орталық ұйымдастырды. Ұйымдастырушылар мұндай бастамалар мәдениетаралық байланысты нығайтуға ықпал ететінін атап өтті.
Свами Вивекананда атындағы мәдени орталық директоры Налини Сингхалдың айтуынша, шара адамдарды біріктіру мен денсаулық мәдениетін дамытуға бағытталған. Оның сөзінше, йога тек денені шынықтырып қана қоймай, өмір сапасын арттыруға да әсер етеді.
Астанамен қатар Халықаралық йога күні Қазақстанның 20-дан астам қаласында жергілікті әкімдіктер мен қоғамдық ұйымдардың қолдауымен өтті. Бағдарлама аясында таңғы уақытта 108 рет "Сурья Намаскар" жаттығуы орындалды.
Қатысушылар йоганың денсаулық пен психологиялық жай-күйге оң әсерін атап өтті. Олардың айтуынша, бұл тәжірибе адамның ішкі тыныштығын қалыптастырып, өмір салтын жақсартуға көмектеседі.
