Астана қаласының әуежайында жасанды интеллектіні пайдалана отырып жолаушыларды биометриялық аутентификациялауды енгізу бойынша пилоттық жоба іске асырылуы мүмкін. Көлік министрлігі тиісті бұйрық жобасын әзірледі, деп хабарлайды inbusiness.kz сайты.
Цифрлық кодекстің 48-бабының 4-тармағына сәйкес, Астана қаласының әуежайында жасанды интеллектіні пайдалана отырып жолаушыларды биометриялық аутентификациялауды енгізу бойынша пилоттық жоба көзделіп отыр.
"Жоба Астана әуежайында жолаушыларға қызмет көрсету процесін жақсартуға бағытталған. Биометриялық аутентификация бойынша жобаны енгізу жолаушыларға қызмет көрсету уақытын қысқартуға, ұшу алдындағы рәсімдерден өтуді оңтайландыруға және Астана әуежайындағы қауіпсіздік деңгейін арттыруға мүмкіндік береді", – делінген бұйрық жобасында.
Құжат "Ашық НҚА" порталында жарияланды. Көпшілік талқылау 4 қарашаға дейін жалғасады.
