"Астана Банкі" АҚ салымшыларына Қазақстанның депозиттерге кепілдік беру қорынан (ҚДКБҚ) өтемақы алу мерзімі ұзартылды.
Еске сала кетсек, 2018 жылғы 26 қарашада Алматы қаласының мамандандырылған ауданаралық экономикалық соты "Астана Банкі" АҚ-ны мәжбүрлі түрде тарату туралы шешім қабылдаған еді. Ал 2019 жылғы 9 қаңтарда Алматы қаласы МАЭС-ның бұл шешімі заңды күшіне енді.
Осыдан кейін аталған банктің салымшыларына ҚДКБҚ өтемақы төлеуге агент банк ретінде "Еуразиялық банк" АҚ-ны белгіледі.
Төлем басталған сәттен бастап 2019 жылдың 26 қаңтардан "Астана Банкі" АҚ-ның 52 мың салымшысы агент банкке өтемақыны алу үшін өтініш жасады. Жалпы сомасы 36,9 млрд теңгеге өтемақы төленді. Осылайша, ҚДКБҚ "Астана Банкі" АҚ салымшылары алдындағы міндеттемелерін 98,4% -ға өтеді.
Қалған 1,6%-ы – бұл, негізінен, шоттардағы шағын қалдықтар, оларды алуға адамдар, әдетте, асықпайды. Атап айтқанда, "Астана Банкі" АҚ салымшыларының 64%-ы бір мың теңгеден аз депозиттерге, ал салымшылардың 79%-ы – бес мың теңгеден аз депозиттерге ие болған. "Астана Банкі" АҚ-ның төлемді қайтаруға жүгінбеген салымшыларының саны 216 мың адамды құрайды.
