Елордада қаланы жылумен қамтамасыз ететін "Астана - Энергия" жұмысшыларына сыйақы берілді, деп хабарлайды әкімдіктің ресми сайты.
Қала әкімі оларды құттықтап, шаһарды жылумен қамтамасыз етуде олардың маңызды әрі жауапты жұмыс атқарып жүргенін атап өтті.
"Елорданың ЖЭО – қала тіршілігіндегі стратегиялық маңызды кәсіпорын. Сіздердің жұмыстарыңыздың арқасында қаладағы барлық үйлер мен объектілер жылумен қамтамасыз етіліп отыр. Соңғы он жылдың ішінде қаладағы тұрғын саны екі есе ұлғайды, көптеген үй, әлеуметтік объектілер салынды. Қала өскен сайын оның электр және жылу жүктемесі де соған сәйкес артып отыр. Өткен жылдарда станция қуаты электр бойынша 2,5 есе және жылу энергиясы бойынша 2 есе ұлғайып, бүгінде 480 МВт және 2 530 Гкал болып отыр. Келесі жылы 2 – ЖЭО-ға қосымша 180 Гкал жылу қуатын (№ 8 котлоагрегат) және 120 МВт электр қуатын (№ 6 турбоагрегат) енгізуді жоспарлап отырмыз. Біз сіздердің еңбектеріңізді бағалаймыз. Келе жатқан Жаңа жылмен құттықтай отырып, сіздерге және сіздердің отбасыларыңызға денсаулық, бақ-береке тілеймін!", – деді қала әкімі Алтай Көлгінов.
"Астана-Энергия" қызметкерлерінің жұмысқа деген жауапкершілігі үшін сыйақы берілді.
"Астана-Энергия" ұжымында 1500 адам екі ауысым бойынша жұмыс істейді. Бүгінде 1- ЖЭО мен 2-ЖЭО қаланың екі жарым мың көппәтерлі тұрғын үйлерін және 300 әлеуметтік-мәдени объектілерін жылуэнергия ресурстарымен қамтамасыз етіп отыр.
