ҚР Қорғаныс министрлігінің әскери бөлімдері қатарына әскери қызметін өтеуге шақырылушыларды салтанатты түрде шығарып салды, деп хабарлайды елорда әкімдігінің ресми сайты.
Астана қаласы әкімдігінің алдындағы алаңда Отан қорғаушылар күні қарсаңында "Қазақстанның әр азаматының борышы – ел қорғау" акциясы болып өтті. Салтанатты шығарып салу кешіне Астана әкімінің орынбасары Ермек Аманшаев, Қарулы күштер бас штабының бастығы Мұрат Майкеев, ардагерлер ұйымы мен мемлекеттік органның өкілдері қатысты.
"Сіздер Отанымыздың жүрегі Астана қаласынан үлкен жауапты жолға аттанып бара жатырсыздар. Сіздерді алда Отан қорғау деген қасиетті борыш күтіп тұр. Әкімдіктің атынан осы бір толқымалы сәтпен құттықтай отырып, алдарыңызға қойылған міндетті абыроймен атқарады деп сенемін", – деді Ермек Аманшаев.
Салтанатты іс-шараға жасөспірімдерге арналған клубтар мен үйірмелердің тәрбиеленушілері мен астаналық мектептің оқушылары шақырылды. Үш мыңнан астам көрермен жекпе жек ойындарын, кадеттердің вальсін, жарылғыш заттарды иіскеп табатын иттердің театрландырылған қойылымын тамашалады.
Естеріңізге сала кетейік, Қазақстанда жедел әскери қызметке көктемгі шақырылым толық көлемде жүріп жатыр. Әскери қызметке 1991-2000 жылы туылған азаматтар шақырылуда.
