Astana LRT компаниясының бұрынғы басшысы Талғат Арданды қамауға алуға сырттай ордер берілді, деп хабарлайды inbusiness.kz порталы "Интерфакс-Қазақстанға" сілтеме жасап.
"Талғат Арданның қай мемлекетте жүргені анықталды. Сот оны сырттай қамауға алуға санкция берді. Аталған елдің құқық қорғау органдары оның қайда екенін анықтап, ұстау бойынша іс-шаралар жүргізіп жатыр. Талғат Ардан ұсталған жағдайда оны дереу экстрадициялау үшін материалдар жіберіледі", - деді Сыбайлас жемқорлыққа қарсы іс-қимыл агенттігінің қызметкерлері.
Сондай-ақ ведомствода Astana LRT экс-басшысының көмекшісі – елорда әкімінің бұрынғы орынбасары Қанат Сұлтанбековтың АҚШ-та екені, оны экстрадициялау үшін материалдар жіберілгенін атап өтті.
"Бүгінде Қазақстанның Бас прокуратурасы халықаралық құқық нормаларына сәйкес оны елге қайтару бойынша шаралар қабылдап жатыр", - деді агенттік мамандары.
Айта кетейік, 28 мамырда Astana LRT ісі бойынша сот үкімі шыққан еді.
Нұр-Сұлтандағы қылмыстық істер жөніндегі мамандандырылған ауданаралық сотының осыған дейінгі отырысында прокурор Диас Янгалышев айыпталушыларға 7-11 жыл аралығында жаза беруді сұраған. Сотталушыларға 5,8 млрд теңгені жымқырды деген айып тағылған.
