Ішкі істер министрі Ержан Сәденов Астанаға кіре берісте бақылау-өткізу бекеттерін орнату қажет деп санамайды. Бұл туралы ол Мәжіліс кулуарында айтты, деп хабарлайды Inbusiness.kz сайты.
БАҚ өкілдері министрден елорда мәслихатының депутаты Азамат Айтхожиннің Астанаға кіріп-шығуды шектейтін блокпост орнату туралы ұсынысына қалай қарайтынын сұрады.
"Біз еркін жүріп-тұруымыз керек. Астананы шектеу - қажет емес нәрселер деп ойлаймын. Бізде қалаға кірген адамдарды жылдам бақылауға жеткілікті қаражат бар. Алайда қаланы жабудың қажеті жоқ", - деді Ержан Сәденов.
Министр бақылау-өткізу бекеттері болмаса да полицейлер тәртіп бұзушылар туралы жылдам хабардар болатынын айтты.
"Сондықтан ешқандай қажеттілік жоқ. Бұрын барлық жерде бақылау-өткізу бекеттері болды. Алайда біз оны алып тастадық. Ал пандемия, төтенше жағдай кезінде бұл әкімдіктің құзырындағы шаруа болады", - деп қосты ІІМ басшысы.
