Астана-Павлодар жолындағы апаттан кейін жас жігіт екі аяғынан айырылды

Алдын ала мәлімет бойынша, Hyundai Tucson автокөлігін басқарған 2004 жылы туған жүргізуші рөлге ие бола алмай, жол жиегіндегі қоршауға соғылған.

Апат салдарынан көліктегі 2005 жылы туған жолаушы ауыр жарақат алды. Куәгерлердің айтуынша, соққының қатты болғаны соншалық, жігіттің бір аяғы оқиға орнында жұлынып кеткен. Сондай-ақ, олардың сөзінше, жедел жәрдем оқиға орнына шамамен бір жарым сағаттан кейін жеткен. Осы уақыт ішінде зардап шеккен жігіт есін біліп жатқан.

Алайда оны Екібастұз қаласындағы ауруханаға жеткізу кезінде жағдайы күрт нашарлап, жүрегі тоқтап қалған. Дәрігерлер науқасты аман алып қалғанымен, кейін жансақтау бөлімінде оның екі аяғын да кесуге мәжбүр болған.

Қазіргі уақытта жігіттің жағдайы ауыр деп бағалануда.

Павлодар облысы Полиция департаментінің мәліметінше, жол апаты салдарынан 3 жолаушы ауруханаға жеткізілген.

– Жол-көлік оқиғасы бойынша тергеу жүргізілуде. Hyundai Tucson автокөлігі арнайы айып тұрағына қойылды, – деп хабарлады ведомство.

Зардап шеккен жігіттің туыстары оқиғаның барлық мән-жайын жан-жақты тексеруді талап етуде.