Халықаралық және Республикалық маңызы бар автомобиль жолдарын басқару жөніндегі ұлттық оператор "ҚазАвтоЖол" ҰК" АҚ жүргізушілерге ескерту жасады. Астана-Теміртау тас жолы бойынша жылдамдық режимі өзгертілді, деп хабарлайды inbusiness.kz сайты.
"Астана-Теміртау автомобиль жолының учаскесінде 1305 километрден 1327 километрге дейін (Бабатай кентінен Аршалы кентіне дейінгі учаске) жылдамдық режимі сағатына 120 км-ден 140 км-ге дейін ұлғайтылды", - делінген хабарламада.
Алайда, ұзындығы 4 км (1327 км +350 м – ден 1331 км +450 м-ге дейінгі Республикалық маңызы бар Екатеринбург-Алматы автомобиль жолының) Аршалы кентінің жанындағы көлік айрығының жанындағы ақылы жол учаскесінде жылдамдықты 120 км/сағ дейін шектеу қолданылады.
Сондай-ақ, Республикалық маңызы бар автомобиль жолдарында жылдамдық режиміне мынадай шектеулер қойылғанын атап өткен жөн:
I-А – 140 км/сағ санаты (Астана-Павлодар, Астана-Щучинск, Астана-Теміртау, Алматы-Қонаев);
I-б – 110 км/сағ санаты (Алматы – Қорғас, Шымкент – Өзбекстанмен шекарасы, Қонаев – Талдықорған, Шымкент – Қызылорда, Шымкент – Тараз, Тараз-Қайнар, Щучинск – Көкшетау);
II санат – сағатына 100 км (Павлодар – Семей – Қалбатау, Көкшетау – Петропавл, Павлодар-Ресеймен шекара (Омбы бағыты), Орал – Ресеймен шекара (Самара бағыты), Орал – Ресеймен шекара (Саратов бағыты), Бейнеу-Ақжігіт-Өзбекстанмен шекара).
