Астана қаласының әкімі Жеңіс Қасымбек желідегі парақшасында кезекті мектеп ашылғанын мәлім етті, деп жазады inbusiness.kz сайты.
"Астанада он жетінші жаңа мектеп ашылды. Бұл елорда үшін абсолютті рекорд болып саналады! Қасым Қайсенов көшесі, 4/1 мекенжайында орналасқан жаңа оқу орны "Жайлы мектеп" ұлттық жобасы аясында салынған. Мемлекет басшысының "Жайлы мектеп" ұлттық жобасы аясында елордада жаңа үлгідегі 10 мектеп салынып, есігін айқара ашты. Осы ұлттық жоба аясында 2024-2025 жылдар аралығында жаңа форматтағы 24 мектеп салынады. Осы мектептердің өзі екі ауысымда 90 мыңға жуық оқушы орнын ашуға мүмкіндік береді, – дейді Астана қаласының әкімі Жеңіс Қасымбек.
Әкімнің сөзінше жыл соңына дейін тағы бірнеше мектеп ашуды жоспарлап отыр.
– Осылайша, тағы 4 мектептің үш ауысымды оқыту проблемасы, сол сияқты тығыздылығы жоғары 3 мектептің қиындығы шешілетін болады. Біз сондай-ақ, алдағы жылдарға да дайындалып отырмыз. 2025 жылы тағы 20-дан астам мектеп салып, пайдалануға беруді жоспарлап отырмыз. Оқу орындарының құрылысына жеке инвестициялар да тартамыз", – деп жазды Жеңіс Қасымбек.
