Астанада адамның бет-бейнесін анықтайтын камераларды орнататын жерлерді анықтау жұмысы басталды. Бұл туралы қалалық әкімдікте өткен аппарат жиналысында Астана әкімінің орынбасары Малика Бектұрова мәлімдеді, деп хабарлайды elorda.info.
"Сергек" фото-бейнебақылау камералары қаланың барлық аудандарында орнатылды. Жол қиылыстарында 200 камера қосылды. Бүгінгі күні қала бойынша 1 536 "Сергек" камерасы жұмыс істейді. Болашақта адамның бет-бейнесін анықтайтын камералар орнату жоспарланып отыр. Бет-бейнесін анықтау үшін бағдарламалық жабдықтау таңдалуда, одан соң камералар орнатылады. Пилоттық жоба ішкі істер министрлігімен жүзеге асырылады", – деді Малика Бектұрова.
Қазіргі күні әкімдік Астананың полиция департаментімен бірге аталған камералар орнатылатын жерлерді анықтауға кірісті.
Еске сала кетейік, Астана әкімдігі аппарат жиналыстарын трансляциялау тәжірибесін бастады.
