Астанада өңірлерінен келген тауар өндірушілердің қатысуымен ауыл шаруашылығы жәрмеңкелері басталады, деп хабарлайды inbusiness.kz сайты Астана әкімдігіне сілтеме жасап.
Алдағы демалыс күндері, яғни 30-31 тамызда алғашқы ауыл шаруашылығы жәрмеңкесі Түркістан облысының тауар өндірушілерінің қатысуымен өтеді.
Фермерлер елорда тұрғындары мен қонақтарына ет, балық, сүт өнімдері, бакалея, көкөніс пен жеміс-жидектерді тікелей өндірушіден ұсынады. Бұл шара азық-түліктің қолжетімділігін арттыруға және отандық кәсіпкерлерді қолдауға ықпал етеді.
Атап айтқанда, Түркістан облысының ауыл шаруашылығы тауар өндірушілері Астанаға 600 тоннадан астам өнім жеткізеді.
Оның ішінде:
- 200 тонна көкөніс;
- 100 тонна ет және ет өнімдері;
- 100 тонна сүт өнімдері;
- 80 тонна бақша дақылдары;
- 50 тонна жеміс;
- 19 тонна балық;
- 12 мың дана жұмыртқа;
- 60 тоннадан астам басқа да азық-түлік бар.
Жәрмеңке аясында концерттік бағдарлама ұйымдастырылады.
"Өтетін орны: "Қазанат" ипподромының автотұрағы, мекенжайы – Қарқаралы тас жолы, 1. Жәрмеңке күндері тұрғындар мен қонақтардың ыңғайлы келуі үшін №18, №37 және №303 автобус бағыттары қатынайды. Жәрмеңкенің жұмыс уақыты – сағат 9:00-ден 18:00-ге дейін", – делінген әкімдік таратқан хабарламада.
