Астанада BAIQYMYZ халықаралық фестивалі аясында ұлттық ат спортына арналған ауқымды шоу өтеді, деп хабарлайды inbusiness.kz сайты.
Бағдарлама елордадағы "Арғымақ" ат спорты кешенінде ASIA KOKPAR LEAGUE мен ER QANATY ұйымдарының бірлесуімен ұйымдастырылады. Көрермендер көкпар, аударыспақ, шөген, ат үстіндегі квиддич, жекпе-жек аттарының көрсетілімі, шабандоздардың өнері және ER QANATY жылқыларының шеруін тамашалай алады.
Биылғы фестивальдің ерекшелігі – ұлттық ат спорты түрлерін заманауи форматпен ұштастыру. Алғаш рет шөген ойыны мен ат үстіндегі квиддич бірыңғай тұжырымдама аясында ұсынылып, ұлттық спортты жастар арасында кеңінен насихаттауға басымдық беріледі.
Ұйымдастырушылардың айтуынша, ат спорты бағдарламасы фестивальдің негізгі тарту нүктелерінің біріне айналып, ұлттық мұра, спорт, мәдениет және отбасылық демалысты бір алаңда тоғыстырады.
Фестивальге қатысу үшін билет сатып алу қажет. Келушілерге бір күндік немесе екі күнге арналған билеттер ұсынылады. Ал зейнеткерлер мен 16 жасқа дейінгі балалар үшін кіру тегін.
