Астанада 22-25 маусым аралығында Дүниежүзі қазақтарының V құрылтайы өтеді. Бұл туралы Орталық Азия жаңалықтар қызметі хабарлайды.
Дүниежүзі қазақтары қауымдастығы төрағасының орынбасары Сұлтанәлі Балғабаевтың хабарлауынша, құрылтай барысында шетелдегі қазақ мәдени орталықтарын қаржыландыру, басқа да көмек көрсету, шетелдік жастарды Қазақстанға білім алуға шақыру сынды мәселелер талқыланады.
"Құрылтайдың мақсаты – шетелдегі қазақтарды Қазақстанға көшуге ынталандыру, олардың қандай қажеттілігі барын анықтау", – дейді Сұлтанәлі Балғабаев.
Ұйымдастырушылардың айтуынша, биылғы құрылтайға шақырылғандардың басым бөлігі – әртүрлі салада жетістікке жетіп жүрген шетелдегі қазақ жастары. Құрылтайға 40-тан астам мемлекеттен 350 адам және әртүрлі халықаралық ұйым өкілдері қатысады.
Дүниежүзі қазақтарының I құрылтайы 1992 жылы Алматыда, II құрылтайы 2002 жылы Түркістанда өткізілген болатын. Ал одан кейінгі құрылтайлар 2005 және 2011 жылдары елордамыз Астанада өтті.
