Биыл 8-15 қыркүйек аралығында Астанада тұңғыш рет өтетін V Дүниежүзілік көшпенділер ойындарына студенттер волонтер ретінде тартылады, деп жазады inbuisness.kz Астана әкімдігінің баспасөз қызметіне сілтеме жасап.
"V Дүниежүзілік көшпенділер ойындарына дайындық аясында волонтерлерді іріктейміз. Бұл жұмыс студенттердің арасында жүргізіледі. Олар ағылшын және түрік тілдерін білуі керек. Волонтерлер тамақ және көлікпен қамтамасыз етіледі", - деді Астана қаласы Жастар саясаты мәселелері басқармасының басшысы Самат Ибраев.
Волонтерлер жарысқа қатысушыларды қабылдау, оларды аккредиттеу орталығы мен қонақ үйлерге апару, спорттық іс-шаралар өткізілетін кешендерге көмек көрсету, мәдени-бұқаралық іс-шараларды ұйымдастыру, ойын кезінде қатысушыларға тамақ жеткізу және тағы басқа жұмысқа жауап береді.
Волонтерлік қызметпен айналысқысы келетіндер worldnomadgames.kz сайтының "Волонтер" бөліміне кіріп, сауалнаманы толтырады. Қосымша ақпаратты Instagram және TikTok-тағы @Volunteer_nomadgameskz парақшасынан және WhatsApp және Telegram-дағы 8 701 841 20 24 нөмірі арқылы білуге болады.
Биыл 8-15 қыркүйек аралығында елордада алғаш рет Дүниежүзілік көшпенділер ойындары өтеді. Онда спорттың 20 түрінен жарыстар ұйымдастырылады. Оған әлемнің 100-ден аса елінен 4 мыңға жуық өкіл қатысады.
