Қардың мол жаууына байланысты Астана қаласының коммуналдық қызметкерлері тәулік бойы күшейтілген режимде жұмыс істеп, қала көшелерінің қарын тазартып жатыр, деп жазады inbusiness.kz сайты.
Соның ішінде күндізгі ауысымда көшелердің қарын тазартуға 1700-ден астам арнайы техника мен 2500-ге жуық жол жұмысшы шықты.
"Ең алдымен, ережеге сәйкес, жолдарда кептеліс болмас үшін қозғалысы өте қарқынды көшелер тазартылады. Сондай-ақ, қарқындылығы орташа учаскелер – алаңдар, вокзал маңы аумағы, тротуарлар, әлеуметтік нысандарға кірме жолдар және т.б. қардан тазартылады", - делінген хабарламада.
Айта кетейік, елордада 7-8 қаңтар күндері аралығында 37 мың текше метрден астам қар шығарылды және бұл 2802 жүк рейсін құрайды.
Ал жалпы қыс мезгілінің басынан бастап Астанада 1 436 205 текше метр қар шығарылды және бұл 105 мыңнан астам ауыр жүк рейсін құрайды.
