Биылғы сәуір айы елорда тұрғындарының есінде ауа райының күрт бұзылып, толассыз жауған қарымен есте қалары анық. Осыған байланысты коммуналдық қызметтер тәулік бойы күшейтілген режимде жұмыс істеп жатыр, деп хабарлайды inbusiness.kz елорда әкімдігінің ресми сайтына сілтеме жасап.
Күн сайын қар күреуге 2,3 мыңнан астам жол жұмысшы, мыңнан астам арнайы техника жұмылдырылады. Ережеге сәйкес, жолдарда кептеліс болмас үшін қозғалысы қарқынды орындардың қары бірінші тазартылады. Мектептерге, балабақшаларға, ауруханаларға кіретін орындар, тротуарлар мен жолдар да қардан тазартылады.
"Алдымен механикаландырылған тазарту жүргізіледі. Бұл жол төсемі жол-көлік құралдарының, сондай-ақ автобустардың, автобус желілерінің өтуі үшін маңызды. Тұрғындардың автобусқа еш қиындықсыз отыруы үшін жаяу жүргіншілер өткелдері қолмен тазаланады", – дейді Сарыарқа ауданы әкімі аппараты бөлімінің бас маманы Жансейіт Тынбаев.
19 сәуірге қараған түні қаладан 36 мың текше метрден астам қар немесе 2567 рейс шығарылды. Қыс мезгілінің басынан бері қаладан төрт миллион текше метрден астам қар шығарылды, бұл 328 мыңнан астам ауыр жүк көлеміне тең.
Коммуналдық қызметтер күшейтілген режимде бір аптаға жуық жұмыс істейді.
"Қиындық тудыратын орындар – тар көшелер, онда қар күреу қиын, өйткені жүріп бара жатқан көліктермен бір уақытта жұмыс істеу керек. Ал магистральдық көшелерде бәрі кезекші режимде жүреді", – деп атап өтті "Астана Тазалық" ЖШС Бас директорының орынбасары Ерлан Рысбеков.
Айта кетейік, өткен демалыс күндері Астанада айлық нормадан 1,5 есе көп қар жауды.
