Астанада Ақын Сара көшесі, 53 мекенжайында орналасқан Inshaat Invest ЖШС "Кіріктірілген үй-жай мен паркингі бар көппәтерлі тұрғын үй кешені" құрылыс учаскесінде жүкті көтеру кезінде QTZ-63 мұнара кранының секциясы бұзылды, деп хабарлайды inbusiness.kz қалалық ТЖД сілтеме жасап.
Оқиға бүгін, 19 сәуір таңғы сағат 09:25 шамасында болған.
Кранның иесі - Капитал ЖК.
Зардап шеккендер жоқ.
Аварияның алдын ала себебі - шамадан тыс жүктеме.
Қазіргі уақытта оқиға орнында өнеркәсіптік қауіпсіздік комитетінің Астана қаласы бойынша департаментінің қызметкерлері жұмыс істеп жатыр.
Департамент пен жергілікті атқарушы органдар өкілдерінің және басқа да мүдделі тұлғалардың қатысуымен аварияны тергеу жөніндегі комиссия құрылады.
Тергеу нәтижесі қосымша хабарланады.
