Жыл сайын өтетін фестивальге 14-тен астам Нобель сыйлығының лауреаттары, 14 "Серпіліс" сыйлығының иегерлері (ғылыми Оскар), әлемдік инноваторлар, 155 елден 500 университет пен 500 мыңнан астам адам қатысады.
26 қазан күні фестиваль аясында "Астана-Ташкент" телекөпірі өтеді. Телекөпір барысында білім деңгейі жоғары және төмен елдердегі әлеуметтік-экономикалық айырмашылықтар, сондай-ақ дамушы елдердегі білім сапасын жақсарту мәселелерін талқылау жоспарлануда.
Бесінші Nobel Fest бір мезгілде қазақ, ағылшын, түрік, қытай, араб, өзбек және орыс тілдерінде 6 студияда - Әзірбайжан, Германия, Түркия, Пәкістан, Қытай, Өзбекстан мен Қазақстанда өтеді.
Іс-шараға қатысу үшін елордаға 2007 жылғы Нобель сыйлығының лауреаты, БҰҰ Бас хатшысының Климаттың өзгеруі жөніндегі кеңесшісі Рае Квон Чунг келеді.
Сонымен қатар, форумға Future Hub B SAP бас футуристі және басшысы Мартин Везовский, "Дүниежүзілік мұғалім" сыйлығының лауреаты Кейша Торп, COMSTECH бас үйлестірушісі М. Икбал Чоудхари, Ғылым және жоғары білім министрі Саясат Нұрбек, Indriver бас директоры және негізін қалаушы Арсен Томский және басқалар қатысады.
"Нобель фестивалінің мақсаты - білім беруді барлығына қолжетімді ету. Бұл ауқымды іс-шара офлайн форматта өтеді. Белгілі спикерлер Астанада үш күн бойы лекция оқиды. Нобель сыйлығының лауреаты аясында тұңғыш рет Қазақстанда Климаттық экономика орталығының ашылуы маңызды оқиғалардың бірі болмақ. Орталық өз есігін М.Әуезов атындағы Оңтүстік Қазақстан университетінде ашады", - деді V Нобель фестивалі бағдарламасының жетекшісі Жұлдыз Адамзатова.
Nobel Fest аясында 31 қазан мен 4 қараша аралығында Нобель дәрістер апталығы ұйымдастырылатынын еске саламыз. Әлемнің түкпір түкпірінен келген Нобель сыйлығының лауреаттары және әлемдегі ең беделді марапаттардың иегерлері университеттер мен студенттер үшін дәріс оқиды.
