Астанада полицейлер есірткі заттарын сақтап, таратты деген күдікпен 33 жастағы ер адамды ұстады, деп хабарлайды inbusiness.kz сайты.
Оның пәтерінен жалпы салмағы 2 келіден асатын есірткі тәркіленді.
Жеке тінту кезінде күдіктінің бел сөмкесінен марихуана салынған түйіншектер табылған. Ал пәтерін тінту барысында әртүрлі жерден түрлі түсті изолентамен оралған, ішінде ұқсас зат бар 2 мыңнан астам түйіншек анықталды.
Сонымен қатар сұйық зат құйылған түтікшелер тәркіленді. Сараптама нәтижесінде оның гашиш майы екені анықталды.
Полицейлердің мәліметінше, ер адам мессенджерлер арқылы тыйым салынған заттарды сататын интернет-дүкенге "қойма" қызметін атқарған. Медициналық куәландыру кезінде оның есірткі қолданғаны да анықталды.
Аталған факті бойынша қылмыстық іс қозғалды. Қазір есірткінің заңсыз айналымына қатысы бар өзге де тұлғалар анықталып жатыр.
