Бүгін Астанада World Robot Olymiad тақырыбымен робототехникадан сайыс басталды, деп хабарлайды astana.gov.kz.
Еліміздің барлық аймақтарынан 150-ден астам команда қатысуда. Чемпионатта бақ сынауға 300-ге жуық бала келді, олардың 200-ден астам өкілі – интеллектуалдық мектептердің оқушылары. Ең үлкен делегация Алматыдан жетті. Чемпионаттың ең жас қатысушысы Павлодардан - 8 жаста. Сонымен қатар, биыл сайысқа Өзбекстан елінің өкілдері де қатысады.
Ұлттық жарыс екі кезеңнен тұрады. Бірінші іріктеу кезеңі аймақтарда өтеді, ал екінші кезең – Астанада болады. Чемпионат НИМ-де осымен үш жыл қатарынан ұйымдастырылуда. Осы жылдың тақырыбы – "Тұрақты даму".
Салтанатты ашылу рәсімі халықаралық мамандандырылған "ЭКСПО көрмесінің конгреес-орталығында ҚР білім және ғылым министрі Ерлан Сағадиевтің, "Назарбаев интеллектуалдық мектептері" ААҚ басқармасының төрайымы Күләш Шәмшідинованың қатысуымен өтті.
"Мен робототехниканың Қазақстанда болашақта қарқынды дамитынына сенімдімін. Өйткені, қызығушылық жоғары және елімізде мықты жаттықтырушылар құрамы дайындалған. Қызығушылықтың бар екенін аймақтарда құлтемірлер байқауының ұйымдастырылып жатқанынан аңғаруға болады. Мысалы, Қарағанды үшінші рет өткізуде", - деді журналистерге берген сұхбатында "Назарбаев интеллектуалдық мектептері" ААҚ басқармасының төрайымы Күләш Шәмшідинова.
Ұлттық сайыстар мен оқыту-жаттықтыру жиындарының қорытындысы бойынша 2017 жылдың қарашасында Коста-Рикада өтетін байқауда республика намысын қорғайтын Қазақстанның ұлттық құрамасы жасақталады.
Сандық әлемнің жаһандық мәселесін шешу және 12 мемлекет заманауи мектептердің креативті ойлауын қалыптастыру үшін World Robot Olympiad құрды.
Естеріңізге саламыз, "Назарбаев интеллектуалдық мектептері" ААҚ 2014 жылы WRO ережелері бойынша робототехникадан Қазақстанның ұлттық үйлестірушісі дәрежесін алған болатын.
