Елордадағы "Сарыарқа" велотрек кешенінде Қазақстан Республикасының қысқы чемпионаты басталды, деп хабарлайды inbusiness.kz Астана әкімдігінің ресми сайтына сілтеме жасап.
Велоспорт елімізде танымал спорттың бірі саналады. Жазғы Олимпиада ойындарында Александр Винокуров Сиднейде күміс жүлдегер болса, Лондонда чемпион атанған болатын. Былтыр Ханчжоудағы жазғы Азия ойындарында да жерлестеріміз жеңіс тұғырынан көрінді.
"Міне, енді сіздердің араларыңызда да болашақ Олимпиада чемпиондары бар деп сенемін. Барлықтарыңызға сәттілік!", - деп Астана қаласы Дене шынықтыру және спорт басқармасы басшысының міндетін атқарушы Еркеғали Корбозов жарыс қатысушыларға сәттілік тіледі.
Байрақты бәсекеге Астана қаласы, Абай облысы, Алматы облысы, Ақмола облысы, БҚО, Жамбыл облысы, Жетісу облысы, Қарағанды облысы, Қостанай облысы, Қызылорда облысы, Маңғыстау облысы, СҚО, ШҚО және көрші Өзбекстан мемлекетінен 199 спортшы тіркелді.
