Астанада Қазақстаннан тыс жерде әрекет еткен алаяқтарға көмектескен "дропперлер" тобының іс-әрекеті әшкереленді, деп хабарлайды inbusiness.kz сайты.
Анықталғандай, 2025 жылғы 5-7 ақпан аралығында шетелде орналасқан алаяқтар "Call-орталық" ұйымдастырып, IP-телефонияны пайдалана отырып, Қазақстан азаматтарына қоңырау шалған. Олар өздерін мемлекеттік мекемелердің қызметкерлері ретінде таныстырып, азаматтарды күмәнді ақшалай аударымдар туралы жалған ақпаратпен алдап, қаражатты Ұлттық банктің "қауіпсіз" шоттарына аударуға көндірген.
"Ақшаны қолма-қол шығару үшін Қазақстанның төрт азаматы алаяқтармен тартылған, оның ішінде кәмелетке толмағандар анықталды. Олардың ішінен екеуі сыйақы үшін өзге тұлғалардың атына ресімделген банк карталарын іздестірген. Біреуі карталарды алып отырған, ал екіншісі банкоматтар арқылы ақшаны шешіп отырған. Қолма-қол қаражат кураторларға беріліп, олар өз кезегінде ұйымдастырушылардың нұсқауы бойынша ақшаны криптовалютаға ауыстыратын тұлғалардың шоттарына аударып отырған", – делінген қалалық прокуратура таратқан ақпаратта.
Салдарынан 7 адам жәбірленуші болып танылды, материалдық шығын 5,5 млн теңгеден асты.
Барлық айыпталушы сотқа берілді.
