Әсіресе шырша, қайың, қарағай сынды көпжылдық өсімдіктердің санын көбеймек. Қаланың ластанып, экологиясы нашарлап бара жатқанына алаңдаушылық білдірген тұрғындар өткен сенбідегі сенбілікке бір кісідей атсалысты. Елордамызды қоқыстан тазалауға 62 мыңнан астам тұрғын жиналыпты.
Сабыр Құсаинов Көкталдың ең үлкен тұрғындарының бірі. Қаладағы ақсақалдар ұйымын басқарады. Сенбілікке жастарға үлгі көрсетейін деген мақсатта қазыналы қарттардың бәрін ерте келіпті. Оларды айналаны таза ұстап, табиғатқа қамқор болу керектігі ұмыт болып бара жатқаны алаңдатады.
Біздің қаламыз аса таза деп айта алмаймыз. Бірақ түтіні бар, жастар болсын, халқымыз тазалық жағына аса көп мән бермейді. Осындай жиналыста барлығымыз көп жұмыс істеп, еңбек көрсететін уақыттар болған. Тойға келгендей болып жиналып келетінбіз. Міне, соның жалғасы қазір жүріп жатыр. Соған қуаныштымыз.
Сарыарқа ауданындағы жалпыхалықтық сенбілікке 12 мыңнан астам адам қатысты. Бір ғана Көктал саябағын тазалауға 2 мың тұрғын жиналды. 2 жыл бұрын ғана ашылған демалыс орнына енді жаңадан егілген 150 ағаш сән беріп тұрады.
"Сарыарқа ауданы бойынша қайың, шырша, қарағай, қылқан жапырақты 600 түп ағаш егілді. Жыл сайын күз және көктем кезінде эко-айлық өткізіп тұрамыз. Осы жылы таңдау Көкталға түсті" – дейді Астана қ. Сарыарқа ауданы әкімі аппаратының коммуналдық шаруашылық бөлімінің бас маманы Жансейіт Тыңбаев.
"Бұл Көктал-1 паркі былтыр ғана тапсырылған. Бірақ әлі көптеген жұмыстар жасау керек. Балаларға деген ойнайтын жерлер әлі істелінбеген, үлкендерге демалатын орындарды тағы көбейту керек деп ойлаймын. Жалпы бұл паркке бәріміз әлі де жабылып, осы парктың гүлденуіне бәріміз үлес қосуымыз керек. Сонда қала тұрғындарының жақсы демалатын орны болады" - дейді Астана қаласы мәслихатының депутаты Бауыржан Смайылов.
Қалың қармен алысып, қатал қысты еңсерген жұрт қаладағы орталық көшелер, саябақтар мен қоғамдық орындарды тазалады. Жұмыла көтерген жүк жеңіл демекші, қала аумағынан 550 тонна қоқыс шығарылды.
