Жаңа жыл қарсаңында брендтелген жаңа жылдық электр пойызының алғашқы рейсі Астанадан Бурабай курортына аттанды. Бұл туралы ҚР Туризм және спорт министрлігі хабарлады.
Жаңа жылдың басты кейіпкерлері - Аяз Ата мен Ақшақар жолаушыларды келе жатқан мерекемен құттықтап, сыйлықтар табыстады. Олардың рөлінде - вагондардың жолсеріктері.
Мерекелік безендірілген құрам жаңа жылдық демалыс маусымы аяқталғанға дейін жүреді.
"Екінші жыл қатарынан біз жаңа жыл қарсаңында ҚТЖ-мен бірлесіп, брендтелген туристік пойыздарды іске қосып отырмыз. Мұндай пойыздар мерекелік атмосфераны құрып қана қоймай, туристерді де тартады", - деді ҚР Туризм және спорт вице-министрі Ержан Еркінбаев.
Бұл ретте өткен жылы жаңа жылдық электр пойызымен 16 мыңнан астам жолаушы тасымалданды.
Мерекелік құрам 28 желтоқсаннан бастап аптасына бес рет жүреді. Елордадан Бурабай курортына пойыз Нұрлы жол вокзалынан сағат 06:12-де жөнелтіледі. Сонымен қатар, елорда тұрғындары мен қонақтарына ыңғайлы болу үшін пойызға Астана-1 вокзалынан да отырғызу қарастырылған. Бұл жерге экспресс таңғы сағат 06:37-де келіп, 07:00-де жүреді.
Туристік пойызды іске қосу аясында ҚР ПІБ "Бурабай даму" ЖШС ерекше рейстің кестесіне сәйкес қысқа тур қалыптастырды. Жаңа жылдық тақырыпты жалғастыру мақсатында, Бурабайдағы Санта резиденциясына барып, Бурабайландта таңғажайып күн өткізу ұсынылады. Мұнда бұғы немесе ит жегілген арбамен, квадроциклмен, қарда жүретін көліктермен серуендеуге, атқа мінуге болады.
Соңғы жылдары Бурабай жыл мезгіліне қарамастан, жазда жағажай демалысын, күзде және көктемде сауықтыру туризмін, ал қыста керемет жаңа жылдық атмосфераны ұсынатын тартымды демалыс орны ретінде танымал.
Осылайша, жаңа жылдық туристік пойыз - аймаққа қосымша туристер ағынын тартатын әрі жергілікті туроператорлардың белсенділігін қамтамасыз ететін маусымдық жергілікті өнімнің мысалы.
