18 қазаннан бастап Нұр-Сұлтанда қоғамдық көліктің бірнеше маршруттары бойынша жол жүру кез келген екінші деңгейдегі банктің картасымен төленуі мүмкін, деп sputnik.kz-ке сілтеме жасап хабарлайды inbusiness.kz.
Елордалық City Transportation Systems көлік компаниясының хабарлауынша, бұл жоба пилоттық режимде жұмыс істейді және 31 қазанға дейін жалғасады.
"VISA мен Mastercard картасын, сондай-ақ NFC жүйесімен жабдықталған смартфонды пайдалана отырып төлем жасай аласыз. Транзакцияны жүзеге асыру үшін оларды валидатордың жанында орналасқан арнайы терминалға қою жеткілікті", –делінген компания хабарламасында.
Пилоттық жоба №61 қалалық бағыттағы үш автобуста және қала маңындағы үш автобуста – №309, 310, 315-те іске қосылады. Олар арнайы сәйкестендіру жапсырмаларымен белгіленеді.
Банк картасымен төлеу кезінде жол жүру ақысы өзгеріссіз қалады – 90 теңге.
