Үстіміздегі жылдың мамыр айында елорданың жаңа темір жол вокзалы пайдалануға беріледі. Бұл туралы бүгін елордадағы Тәуелсіздік сарайында өтіп жатқан ЭКСПО-2017 көрмесіне қатысушылардың үшінші жиналысында Астана қаласының әкімі Әсет Исекешев мәлім етті, деп хабарлайды "ҚазАқпарат" ХАА.
"Үстіміздегі жылдың мамыр айында әуежайдың халықаралық және ішкі рейстері бөлінген жаңа терминалының құрылысы аяқталып, өткізу мүмкіншілігі 7,6 млн адамға дейін артады. Сонымен қатар тіркеу орындарының саны артып, туристерге тіркеуден кедергісіз өтуге мүмкіндік береді", – деді Исекешев.
Сонымен қатар елорда әкімі осы жылдың мамыр айында жаңа темір жол вокзалының да құрылысы аяқталатындығын атап өтті. Вокзал пайдалануға берілгеннен кейін оның жолаушыларды өткізу мүмкіндігі жылына 9 млн адамға дейін артатын болады. "Бұл Қазақстанның барлық өңірлерінің, сонымен қатар таяу шет елдердің туристеріне ЭКСПО-ға келуге мүмкіндік береді", – деді ол.
Исекешев көрмеге келетін қонақтарды орналастыру мәселесіне қатысты да жайттармен бөлісті.
"Қазіргі уақытта елордада 169 қонақ үй мен 36 хостел жұмыс істейді. Бұған қоса, көрме басталар алдында тағы 16 қонақ үй кешені ашылады. Мұнан бөлек, біз жалдамалы баспаналарды тарту жұмыстарын қарқынды жүргізудеміз. Жалға берілетін пәтерлер әлеуеті шамамен 10 мыңды құрайды. Жалпы, кемінде 35 мың орын дайындау жоспарлануда", – деді Астана әкімі.
Айта кетерлігі, ЭКСПО-2017 халықаралық мамандандырылған көрмесі 10 маусымда басталып, 10 қыркүйекте аяқталатын болады. Көрмеге 2 миллионнан астам адам келеді деп күтілуде. Олар көрмені кемінде екі рет аралайды деп жоспарланған. Жалпы көрмені тамашалаушылардың 85 пайызын Қазақстан азаматтары, ал қалған 15 пайызын шетелдіктер құрайды. Шетелдіктердің басым бөлігін ТМД елдерінің және Қытайдың азаматтары құрайды деп күтілуде. Қазіргі уақытта 112 мемлекет пен 18 халықаралық ұйым ЭКСПО көрмесіне қатысатындығын ресми түрде растап отыр.
