Қарасу ауданындағы ферма 19 жылда ірі-қара басын жүз есе көбейтіп, он мыңға жеткізді. "Сыбаға" бағдарламасы жүзеге асқалы бұл шаруашылықтан сиыр сатып алуға ынталы кәсіпкердің саны артқан. Асыл тұқымды ірі-қараның бір парасы бәссауда арқылы биыл да сатылымға шықты, деп хабарлайды 24.kz.
Қарасу ауданында тап мұндай бәссауда осымен бесінші рет өтіп отыр. Биылғы "жәрмеңкеге" еліміздің 4 облысынан 20-ға тарта қатысушы келген. Сатылымға асыл тұқымды 60 бұқа шығарылды. 16-18 айлық тайыншалардың бастапқы бағасы жарты млн-ға жақындайды. Айдар Нығметов Қарасудағы бәссаудаға мал дәрігерін ертіп, Ақмола облысынан арнайы келді. Мақсаты – асыл тұқымды сиыр сатып алып, репродуктивті шаруашылық ашу. Бұл жолы олар екі жүз бас қашар сатып алуға келісім жасасты.
