25 тамызда өрт механикалық тазарту құрылысының жабық типтегі тұндырғышында шыққан. Оқиға кезінде нысанда жұмыс жүргізілмеген, деп жазады inbusiness.kz сайты.
"112" пультіне хабарлама сағат 12:55-те түскен. Нысанның ерекшелігіне байланысты ТЖМ күштері жоғары деңгейлі шақыру бойынша жұмылдырылды.
Тілсіз жауды сөндіруге 65 адам, 19 техника, сондай-ақ "Семсер өрт сөндіруші", АТМА әуежайы және NCOC компаниясының ПСС қызметкерлері қатысқан. Сағат 13:42-де өрт оқшауланып, кейін толық жойылды. Зардап шеккендер жоқ.
Атырау облысының төтенше жағдайлар департаменті хабарлағандай, АМӨЗ-дегі өртке байланысты қылмыстық іс ҚР ҚК-нің 292-бабы ("Өрт қауіпсіздігі талаптарын бұзу") бойынша тергеліп жатыр.
Басқа мәліметтер жарияланбайды, себебі ҚР ҚПК-нің 201-бабына сәйкес сотқа дейінгі тергеу деректері құпия сақталады. Бұл бап тергеу барысындағы ақпаратты жария етуге тыйым салады.
АМӨЗ аумағында болған өрттің себептерін анықтау үшін арнайы комиссия жұмыс істеп жатыр.
