Министрліктің хабарлауынша, өңір Қазгидрометтің ұсынымдары бойынша су тасқыны қаупі бар өңірлер тізіміне енгізілген. Бұл өңірдегі негізгі қауіп Жайық өзенінің және жаңбыр суының тасуы болуы мүмкін.
"Жайық өзені ағынының 80%-ы Ресей Федерациясының аумағында қалыптасады. Ол су тасқыны кезінде қар мен жаңбыр суының еруі есебінен толады, сондай-ақ Ирикла су қоймасының жұмыс режимдерімен анықталады. Топырақтың ылғалдану және қату тереңдігі, осы аймақтағы жауын-шашынның нормадан жоғары болуы факторларын да ескеру қажет. Бұдан бөлек Атырау облысының аумағы жаңбыр суының тасуына бейім. Мысалы, 2022 жылғы 8 мамырға қараған түні мен 10 мамыр аралығында нөсер жауын салдарынан облыс аумағында тұрғын үйлер мен аула аумақтарын су басу жағдайлары тіркелді", - делінген министрлік таратқан ақпаратта.
ТЖМ мәліметінше, жаңбыр суы басуының негізгі себептеріне мыналар жатады:
- соңғы айларда жауын-шашынның көп түсуіне байланысты жер асты суларының деңгейінің көтерілуі;
- еркін фильтрацияға және инфильтрацияға кедергі келтіретін топырақтың сазды құрамы мен тұздануы;
- жерүсті ағындары мен жерасты суларының ағуына кедергі келтіретін тегіс рельеф.
