2026 жылғы қаңтар-мамыр айларының қорытындысы бойынша өңірде 5530 тонна балық ауланды, деп жазады inbusiness.kz сайты.
Оның едәуір бөлігі сыртқы нарыққа шығарылады. Есепті кезеңде 4643 тоннаға жуық балық өнімі экспортталды. Бұл жалпы ауланған балық көлемінің 84%-ын құрайды.
Өңір кәсіпорындары өнімнің бәсекеге қабілеттілігін арттыру мақсатында өндірістік әлеуетті жаңғыртып, өнім түрлерін кеңейтуде, балықты қайта өңдеудің заманауи технологияларын енгізіп, өткізудің жаңа нарықтарын игеруде.
Әсіресе, балықты қайта өңдеу секторын дамытуға, шикізатты өңдеу деңгейін арттыруға және өндірілетін өнімнің сыртқы нарықтардың талаптарына сәйкестігін қамтамасыз етуге ерекше көңіл бөлінуде. Бұл шаралар тұрақты өндірістік базаны қалыптастыруға, сондай-ақ өнімнің қосылған құнын ел ішінде арттыруға бағытталған.
Балық шаруашылығын дамыту – агроөнеркәсіптік саясаттың басым бағыттарының бірі. Бұл сала азық-түлік қауіпсіздігін қамтамасыз ету, елдің экспорттық мүмкіндіктерін арттыру және өңірлер экономикасының дамуына ықпал ету тұрғысынан маңызды рөл атқарады.
