Биылғы жылы "Атырау-Орал" жолының 75-125 шақырымы қайта жаңартылмақ. Қазіргі кезде жұмыстарындың жобалық-сметалық құжаттамасын әзірлейтін компания анықталды. Бұл туралы ИИДМ баспасөз қызметі хабарлады.
"Жол қайта жаңарту жұмыстарынан өткен соң төрт және екі жолақты болады. Бүгінгі таңда автомобиль жолының 75-125 шақырымында қайта жаңарту жұмыстарын жүргізуге арналған ЖСҚ әзірлейтін жобалық компания анықталған. Жоба осы шаралар аяқталған соң іске асырыла бастайды", – деп хабарлады министрлік.
Аталған автомобиль жолы осыдан 15 жыл бұрын күрделі жөндеуден өткен. Үшінші техникалық санаттағы трасса салмағы 8 тоннаға дейін болатын тәулігіне шамамен 3000 көлікті өткізе алады.
"Айта кету керек, жоба автомобиль жолының өткізу қабілетін арттыруға, апаттық жағдайларды төмендетуге, Атырау және Батыс Қазақстан облыстарының әлеуметтік-экономикалық дамуын жақсартуға, сондай-ақ, Қазақстанның транзиттік әлеуетін арттыруға мүмкіндік бермек", – деп жазылған хабарламада.
Еске салайық, "Атырау-Орал" автомобиль жолы 2020-2025 жылдарға арналған "Нұрлы жол" мемлекеттік бағдарламасы аясында қайта жаңартылады. Ол Каспий теңізінің порттарына шығуға мүмкіндік беретін екі облыс орталығын байланыстыратын маңызды транзиттік дәліз.
