"Азаматтар үшін үкімет" мемлекеттік корпорациясының Атырау облыстық филиалы Жер кадастры және жылжымайтын мүлікті техникалық зерттеу департаментінің директоры К.Теміров 800 мың теңгеден астам пара алғаны үшін ұсталды. Бірнеше мәрте пара алған шенеунікті Атырау облысы бойынша жемқорлыққа қарсы іс-қимыл ұлттық бюросы департаменті қолға түсірген. Бұл туралы "ҚазАқпарат" ХАА хабарлайды.
К.Теміровтың бағынышты қызметкерлерін лауазымға тағайындау және қызмет барысында жалпы қамқорлық танытқаны үшін үнемі пара алып отырғаны анықталған. Мәселен, Исатай аудандық бөлімшесі жетекшісі лауазымына тағайындау үшін 100 мың теңге, Индер аудандық бөлімшесінің бас маманы қызметіне тағайындау үшін 50 мың теңге пара алған.
Мұнан бөлек, ол Атырау қаласында кезектен тыс жеке тұрғын үй құрылысына арналған жер телімін бергені үшін жалпы сомасы 670 мың теңгеден астам пара да алғаны белгілі болды.
Қазіргі уақытта К.Теміров ұсталып, Атырау қалалық ІІД уақытша оқшаулау изоляторына қамалды. Сотқа дейінгі тергеу жүргізілуде.
