Атырауда АИТВ (адамның иммунтапшылық вирусы инфекциясы) жұқтырған 400 адам есепте тұр. Биыл оны жұқтырғандар саны 14 адамға өскені алаңдатады, деп жазды inbusiness.kz тілшісі.
Дертке шалдыққандардың 284-і Атырау қаласында, 13-і Жылыой, 6-ы Индер, 1-і Исатай, 2-і Қызылқоға, 7-і Құрманғазы, 2-і Мақат, 6-ы Махамбет ауданында анықталған. Ал осы жылдың басынан бері 32 адамның вирус жұқтырғаны белгілі болған. Бұл өткен жылдың осы уақытымен салыстырғанда 14 жағдайға көп.
Атырау облыстық ЖИТС(СПИД)-ке қарсы күрес және алдын алу орталығы эпидемиология бөлімінің меңгерушісі Ж. Төлемісованың айтуынша, індеттің құрығына іліккендердің 187-сі, яғни 58,2 пайызы ер адам, ал 134-і (41,7%) әйел. Олардың жас ерекшелігі әртүрлі, 19 жасқа дейінгілер саны – 11, 20-39 жас аралығында 218, 40 пен 62 жас аралығында 92 адам осы вирусқа шалдыққан.
Әлеуметтік мәртебесі бойынша нақтылайтын болсақ, бұлардың ішінде 116 адам жұмыс жасайды, 173-і еңбекпен қамтылмаған. Алты науқас мектеп оқушысы және студент, екі адам әскери, біреуі зейнеткер. Ауру жұқтырғандар арасында шетелдіктер саны – 79.
"Вирусты жұқтырудың негізгі жолы – жыныстық қатынас. АИТВ адамдарға 80 пайыз осы жолмен жұққан", – дейді Ж. Төлемісова.
Қазіргі күні облыста "АИТВ: әрбірін түсіну" атты онкүндік өтуде. Қараша айының 15-25 аралығын қамтитын шара аясында медициналық және басқа да құрылымдарда кездесулер өткізіліп, халықты салауатты өмір салтын сақтауға шақыратын шаралар ұйымдастырылып, АИТВ-ың алдын алу туралы ақпараттық-насихат жұмыстары ұйымдастырылады. АИТВ инфекциясын анықтаудың жалғыз жолы – барлық емханалар мен ЖИТС орталығында тегін жүргізілетін зертханалық тексеріс деуге болады. Бұдан бөлек, ЖИТС орталығында анонимді тексерілу, достастық кабинеті, сенім бекеті мен сенім телефоны қарастырылған.
Құралай Қуатова
