Атырауда былтыр күзде қалаға 379 жыл толу құрметіне ашылған скейт-саябақтың сапасы сын көтермейді. Ашылғанына көп болмаса да бетоны шұрқ тесіліп, тұрғындардың жүріп-тұруына, балалардың сырғанауына кедергі келтірген экстремальды демалыс алаңы жақында қайта жөндеуден өткізілген болатын. Алайда, оның қазіргі түріне де ешкімнің көңілі толар емес.
Бұрын нысанды қала күніне орай тапсыру керек болғандықтан асығыс-үсігіс жасалғаны көзге түсіп-ақ тұратын. Белгілі болғандай, скейт-саябақ бар-жоғы 25 күнде салынып, тапсырылған.
Бұл жолы мердігер мекеме оның сапасына тікелей жауапты еместігін алға тартып отыр.
-Бұл жер ешкімдікі де емес, бір жылдан асты, қолымызда әлі мемлекеттік акт жоқ. Нысанды белгісіз біреулер пайдаланады, сондықтан, біз мұнымен айналысқымыз келмейді", - дейді мердігер мекеме директорының орынбасары Абай Хамидулла.
Көлемі 1600 шаршы метр болатын скейт-саябақ демеушінің қаражатына салынған қайырымдылық жоба ретінде саналады. Сол себепті, оның сапасына шағымдануды орынсыз санайтындар бар. Алайда, сырғанаған сайын тәуекелге бас тігетін жасөспірімдер мен олардың жағдайына алаңдаған ата-аналар алаңның барынша қауіпсіз болғанын қалайды.
Құралай Қуатова,
Атырау облысы
