Мереке Құмаров бүгін таңертең әйелін өзі босандырып алыпты. 8-ге таман келіншегі өзін жайсыз сезініп тұрғанын айтқан. Бірден жедел-жәрдемге қоңырау шалған. Олар келем дегенше, телефонның ар жағындағы дәрігердің кеңесімен алтыншы перзентін қолына алыпты, деп хабарлайды Inbusiness.kz сайты Астана арнасына сілтеме жасап.
"Қабылдаған диспетчердің ұзақтығы деп ойлаймын. Ол кісілерге аты жөні мен диагнозын айтқан кезде, ол кісі қайталап кері сұрады, жасын, қосымша информация сұрап жатты. Мен экстренный вызов беріп бала шығып жатыр дегеннен кейін жедел жәрдем қызметі дереу қабылдау керек деп ойлаймын. Басында бала үндемей қалды шығып жатқанда. Екі аяғынан көтеріп, құйрықтан тартқан кезде бақырды. Аллаға шүкір баланың жағдайы жақсы болды", - дейді қала тұрғыны Мереке Құмаров.
Көпбалалы отбасының үлкені 9 жаста, кішісі екіде. Отағасы үйде өзім болмасам, не боларын көз алдыма елестете де алмаймын дейді. Жедел жәрдем босанған соң 15 минуттан соң ғана келіпті. Ана мен баланы бірден перзентханаға алып кеткен. Дәл осындай тағы бір жағдай тіркелді. Жедел жәрдемдегілер болса, үйден босану әсіресе көпбалалы аналарда кездеседі дейді. Өздерін тәжірибелі сезініп, уақыт оздырып жүріп алатын көрінеді. Жылына шамамен 50 шақты жүкті әйел үйіне босанады екен.
"Категория бойынша жедел-жәрдем уақытында барған. Ешқандай кешігу көріп тұрған жоқпын. Бұл әйел адам 3-санатқа жатады. Жарты сағаттың ішінде бару керек. Физиологиялық үй жағдайында босану қалыпты жағдай болып саналады", - дейді облыстық жедел жәрдем станциясының директоры Азамат Ерболов.
